ဈေးသည်

အလုပ်မရှိတဲ့အခါ ...ဦးနှောက်အားအားယားယားဖြစ်နေတဲ့အခါ...
တိုက်ခိုက်မှုတွေမရှိတဲ့အခါ...တုန့်ပြန်မှုတွေမလိုအပ်တဲ့အခါ..စိုးရိမ်ပူပန်စရာတွေ
နည်းပါးတဲ့အခါ (အလုပ်အတွက်)...ကိုယ့်အကြောင်းကို ကိုယ်ပြန်စဉ်းစား
တွေးတောနေတတ်ပါတယ်..။။ သူငယ်ချင်းနဲ့လည်း စားမြုံ့ပြန်ဖြစ်ပါတယ်။။
ပြောပြောပြီး ရယ် ...ပြောပြောပြီး လွမ်း......ပြောပြောပြီး တမ်းတပေါ့...။။
(တမ်းတတတ်သည် ဆိုတဲ့ ဝတ္ထုနာမည်တောင် ခေါင်းထဲရောက်လာသေး)

အမေတို့က ဈေးကြီးထဲမှာ ဆိုင်ထွက်ပါတယ် ။။အိမ်မှာတိုဟူးကြော်လည်း
ကြော်ပြီး ဖောက်သည်ပေးပါတယ်...။(အခုတော့ အဲဒီလုပ်ငန်း မလုပ်တော့ပါ)
ငယ်ငယ်က ဈေးပိတ်ရက်ဆို (လပြည့် လကွယ် ဥပုသ်ရက်) အကြော်မကုန်သေးရင်
အဖွားတို့ အမေတို့က ကျနော်ကို စပါတယ်..။။လမ်းထိပ်မှာ ထွက်ရောင်းရဲလားဆိုပြီး။။
ကျနော့်အဖိုးရက်တဲ့ ဘဲဥပုံဝါးခြင်းလေးထဲ တိုဟူးကြော်တွေထည့်ပြီး
လမ်းထိပ်ထွက်ရောင်းခဲ့ပါတယ်။။ အမေတို့ကတော့ တပြုံးပြုံးနဲ့ ။ရောင်းရတာ
မရောင်းရတာ အပထား ။ကျနော်လုပ်ခွင့်ရတဲ့အတွက် ပျော်ပါတယ်..။
အဲဒီတုန်းက ၆နှစ် ရနှစ်သားလောက်ရှိမှာပေါ့...။။


ကျနော်အားကျပြီး လုပ်ချင်တာ တစ်ခုရှိပါသေးတယ်..။။
နွေပေါက်ရင် ဈေးထဲက သစ်သီးဆိုင်တွေမှာ ဖရဲသီးစိတ် ယူရောင်းတဲ့ အလုပ်ပေါ့..။
ကြွေရည်သုတ်ဗန်းလေးထဲမှာ ဖရဲသီးစိတ်တွေ ညီညီညာလေး စီပြီး တမြို့လုံးလှည့်လည်ရောင်း
တဲ့ ဈေးသည်လေးတွေကို မြင်ရင် ကိုယ်ပါ ရောင်းချင်စိတ်ပေါက်လာပါတယ်..။။
ဖောက်သည်ပေးတဲ့ဆိုင်ကလဲ အမေနဲ့ ရင်းနှီးနေတဲ့ သစ်သီးဆိုင်တွေ..။။
ဈေးကြီးအဟောင်းရဲ့ စားသောက်တန်းနဲ့ နောက်ကျောချင်းကပ်လျက်က သစ်သီးဆိုင်တွေပေါ့..။။
သူတို့က နှစ်ဆိုင်ရှိပါတယ်..။တစ်ဆိုင်က ဒေါ်ကြင်ဥ ရဲ့ဆိုင်ပါ..။။(အမေ့အခေါ်ကတော့ မကြင်ဥတဲ့)
သူ့ဆိုင်ရဲ့ မျက်နှာချင်းဆိုင် ဆိုင်ကတော့ အဒေါ်ကြီးဆိုင် (ခ.ဒ.ပ.ခ တို့အမေဆိုင်ပေါ့) ။။
အမေက ကျနော့်ကိုတကယ်ရောင်းချင်ရင် မကြင်ဥတို့ ဒေါ်ကြီးတို့ကိုပြောပေးမယ်ဆိုပြီး
ရယ်ကျဲကျဲ စနေကြပါ ။။ ဒါမယ့် မရောင်းဖြစ်ပါဘူး...။ဘာဖြစ်လို့လဲ ဆိုတော့ ဖရဲသီးစိတ်သည်
ကောင်မလေးတွေရဲ့ ဖရဲသီးစိတ် ဆိုတဲ့ အသံနောက်မှာ ဘယ်....ဦးး...ပြုပ် (ဘဲဥပြုပ်)
ဆိုပြီး ဝိုင်းစတာ မခံနိုင်ပါဘူး..။။


နောက်ပိုင်း ၇တန်း ၈တန်းလောက်မှာ ဆိုင်ကိုဝိုင်းကူလုပ်နေရပြီဆိုတော့ ဆိုင်သိမ်းပြီးမှ
လာစားနေကျ ရပ်ဝေးက ဧည့်သည်ကားတွေ ဆိုက်လာရင် ဈေးမရောင်းလိုက်ရတာတွေ
သိပ်နှမျောပါတယ်..။။ (ဈေးသည် ပီသလာတဲ့သဘောပေါ့နော်..ဟီးဟီ)
တနှစ်မှာ ကျောင်းတက်ဖို့ရာစောင့်နေတုန်း ပိတ်ထားတာ ၁၀နှစ်လောက်ကြာပြီဖြစ်တဲ့
ဈေးကဆိုင်မှာ ဈေးရောင်းဖို့ရာ အကြောင်းဖန်လာပါတယ်...။။အမေအိမ်စောင့်စရာ
အကြောင်းကလဲရှိနေတော့...ကျနော် ဈေးသည်ပီပီသသဖြစ်ဖို့ အကြောင်းဖန်လာတာပေါ့။။
၁နှစ်ပါပဲ .....ပြီးတော့လည်း အိမ်ဆောက်ပြီးတော့ အိမ်ဆိုင်မှာပဲ ဆက်လက်ဆိုင်ဖွင့်ဖြစ်ပါတယ်..။။




အမေ့လက်သုံးစကားတစ်ခု ရှိပါတယ်..။။ "ဈေးရောင်းတာ ရှက်စရာ မဟုတ်ဘူး ...
သမ္မာအာဇီဝနဲ့ လုပ်စားတတ်ဖို့ပဲလိုတယ်" ဆိုတဲ့ စကားလေး..။။
ဈေးထဲမှာ ရောင်းသူ ဝယ်သူတိုက်ရိုက်ထိတွေ့တာ အရောင်းအဝယ် ဈေးသည်ပေါ့..။။
အရောင်းစာရေးတွေ ခန့်ပြီး ဆူပါမားကပ်ကြီး ဖွင့်စားတာလဲ...အဆင့်မြင့်ဈေးသည်။
မှန်ပြူတင်းတွေထဲ လှလှပပချိတ်ဆွဲပြီး ရောင်းတာကလဲ အဆင့်အတန်းရှိဈေးသည်..။။
ရုံးခန်းထဲကနေ ဖုန်းတစ်လုံးနဲ့ ကိုယ့် ကုန်ပစ္စည်းကိုရောင်းနေတာလည်း လေအေးစက်တပ်ဈေးသည်။
ebay ..amazon..မှာရောင်းရင်လည်း အွန်လိုင်းဈေးသည် ။


ကျနော်ဟာ.....
အခု၁၀စုနှစ်မှာလည်း ဈေးသည်နဲ့ ပတ်သက်တဲ့ အရောင်းနဲ့ပဲ ဖြတ်သန်းနေရဆဲ...။။
ထပ်ပြီးရွေးချယ်ခွင့်ရှိခဲ့ရင်လည်း ဈေးသည်ဘဝပဲဖြစ်မယ်ထင်ပါရဲ့...။။
သြော်......
ကျနော် ဈေးသည်..။။




နောက်ဆက်တွဲ...
ဈေးသည်တွေအကြောင်း ထပ်ရေးချင်ပါသေးတယ်..
စိတ်ပါခဲ့ရင်ပေါ့..။။